ദുബായ്~അല്‍ ഐന്‍ റോഡിലെ മാര്‍ഗാമിലെ ദുബായ് ജെറ്റ്മാന്‍ ഹെലിപാഡിലുള്ള ജോബിയുടെ പറക്കല്‍ കേന്ദ്രത്തിലാണ് പരീക്ഷണം നടന്നത്. അടുത്ത വര്‍ഷം ആദ്യ പകുതിയില്‍ എയര്‍ ടാക്സി ഔദ്യോഗികമായി പ്രവര്‍ത്തനം തുടങ്ങും.
സമ്പൂര്‍ണ തോതിലുള്ള എയര്‍ ടാക്സി സേവനങ്ങള്‍ ആരംഭിക്കുന്നതിനുള്ള വിശാലമായ തയ്യാറെടുപ്പുകളുടെ ഭാഗമാണ് പരീക്ഷണമെന്ന് യു എ ഇ ഉപപ്രധാനമന്ത്രിയും പ്രതിരോധ മന്ത്രിയും ദുബായ് കിരീടാവകാശിയുമായ ഷെയ്ഖ് ഹംദാന്‍ ബിന്‍ മുഹമ്മദ് ബിന്‍ റാഷിദ് അല്‍ മക്തൂം പറഞ്ഞു.
നഗരത്തിലുടനീളമുള്ള പ്രധാന സ്ഥലങ്ങളിലേക്ക് സുഗമവും വേഗതയേറിയതും സുരക്ഷിതവുമായ യാത്ര ആഗ്രഹിക്കുന്ന താമസക്കാര്‍ക്കും സന്ദര്‍ശകര്‍ക്കും എയര്‍ ടാക്സി ഒരു പുതിയ പ്രീമിയം സേവനമായിരിക്കുമെന്ന് ദുബായ് റോഡ്സ് ആന്‍ഡ് ട്രാന്‍സ്പോര്‍ട്ട് അതോറിറ്റി ഡയറക്ടര്‍ ജനറലും ചെയര്‍മാനുമായ മതര്‍ അല്‍ തായര്‍ പറഞ്ഞു.
എയര്‍ ടാക്സിക്ക് ഒരു പൈലറ്റിനെയും നാല് യാത്രക്കാരെയും വഹിക്കാന്‍ കഴിയും. ഒരു പരമ്പരാഗത ഹെലികോപ്റ്ററിനേക്കാള്‍ 100 ഇരട്ടി ശബ്ദം കുറവാണിതിന്. ജോബി ആപ്പ് വഴി യാത്രക്കാര്‍ക്ക് ടിക്കറ്റ് ബുക്ക് ചെയ്യാന്‍ കഴിയുമെന്ന് പാപഡോ പൗലോസ് വെളിപ്പെടുത്തി, ദുബായ് ഇന്‍റര്‍നാഷണല്‍ എയര്‍പോര്‍ട്ടിനും (ഡിഎക്സ്ബി) ദുബായ് മറീനയ്ക്കും ഇടയിലാണ് ആദ്യ റൂട്ട്. ഭാവിയില്‍ ഡൗണ്ടൗണ്‍ ദുബായിലേക്കും പാം ജുമൈറയിലേക്കും സര്‍വീസ് വ്യാപിപ്പിക്കാന്‍ പദ്ധതിയുണ്ട്.
കൃത്യമായ കണക്കുകള്‍ വെളിപ്പെടുത്തിയിട്ടില്ലെങ്കിലും, ഒന്നിലധികം എയര്‍ ടാക്സികളുടെ വ്യൂഹത്തോടെയായിരിക്കും പ്രവര്‍ത്തനം ആരംഭിക്കുക എന്നും അദ്ദേഹം വ്യക്തമാക്കി. യുഎഇയിലുടനീളം പറക്കുന്ന ടാക്സി സേവനങ്ങള്‍ വിപുലീകരിക്കുന്നതിനായി കമ്പനി മറ്റ് എമിറേറ്റുകളുമായും ചര്‍ച്ചകള്‍ നടത്തിവരികയാണ്.
Comments: